Desde a Asociación Veciñal queremos amosar toda a nosa solidariedade e apoio á comunidade educativa do IES de Teis nas súas mobilizacións semanais.
A última concentración celebrouse este pasado martes no IES de Teis, onde participou unha representación da xunta directiva da Asociación Veciñal de Teis.
O motivo das concentracións é que a Consellaría de Educación eliminou, sen previo aviso, as horas que o profesorado dedicaba ao mantemento informático. Esta falta de soporte técnico constitúe un grave recorte na calidade do ensino público xa que prexudica directamente a actividade lectiva diaria e incide no desenvolvemento normal das clases.
As súas reivindicacións son lexítimas e xustas polo que nos unimos ás mesmas e convidamos a toda a veciñanza a apoiar activamente estas mobilizacións.
A Asociación Veciñal de Teis quere manifestar publicamente o seu compromiso coa defensa dun ensino público, galego e de calidade, para o noso barrio.
